Ìwé Le!
Túlẹ̀, ẹ sáré wá Akẹ́kọ̀ọ́, ẹ wá gbọ́ nàsíà Òkun kì í hó ruru Ká wà á ruru, àwé! Ìwé le lorin tí wọ́n ń kọ Akẹ́kọ̀ọ́ fìwé wójú ẹja Wọn ò forúnkún tẹ̀pá ìrònú Wọ́n ń fìwé àwọn dápọ̀ṣìn Túlẹ̀ sọ Olú-ẹ̀kọ́ àwọn dọ̀tá àìjírí Wọ́n sọmíi Tíṣà dọ̀tá ojú láàtàn Wọ́n ò pe làákàyè rán níṣẹ́ rí Kí wọ́n lè fìwé náà gba Kúdí inú àpò “Ìwé le” lakẹ́kọ̀ọ́ kọ̀ ń kọ lórin “Ìwé le” lakẹ́kọ̀ọ́ kọ̀ ń fọ̀ lóhùn Mebí ẹ tilẹ̀ rọ́gọ̀ọ̀rọ̀ tó tibi ẹ̀kọ́ ìwé dỌ̀mọ̀wé? Àbí ẹ ò rómilẹgbẹ Kòfẹ́sọ̀ láṣùwàdà náà? Ẹni ó bá kàwé lákàyé láìṣe iyè méjì Irú wọn ní í ráwo ìwé jinlẹ̀ Bí túlẹ̀ bá sọ̀wé kíkà daṣọ ìbora Tí wọ́n fi í bora àwọn nígbàdéègbà Wọn á máa fẹran ẹ̀kọ́ ìwé jẹ̀kọ lákọ̀tun Akẹ́kọ̀ọ́ ò fẹ́ṣẹ́ẹ́ ṣe mọ́ Túlẹ̀ ò fẹ́wèé kà Owó ni kóówá wọn ń lé kiri ní pópó Ọ̀nà àtilà lóòjọ́ ni wọ́n ń tọ̀ nírònà ÀìfÓlùkọ́ wọn dénú jindò Tún fàdí kíwèé ọ̀ún le bí ojú ẹja Ẹ kàwé lákàlà pẹ̀lú akitiyan Ẹ gbájú mẹ́kọ̀ọ́ ìwé, kò kúkú le Ẹ fetí sẹ́kọ̀ọ́, ó rọ̀ ju ẹ̀kọ Ẹ nífẹ̀ẹ́ sÓlùkọ́, olú ìmọ̀ ni wọ́n Pẹ̀lẹ́kùtù ni kí ẹ fi bá àwọn lò Igbá pẹ̀lẹ́ kì í kúkú fọ́ Àwo pẹ̀lẹ́ kì í fàya pẹrẹngẹdẹ.
Nípa Òǹkọ̀wé:
Bákàrè Wahab Táíwò jẹ́ ọmọ ìlú Ọ̀gbàgì-Àkókó ní Ìpínlẹ̀ Oǹdó. Akẹ́kọ̀ọ́ ìmọ̀ Ẹ̀dá-Èdè àti Èdè Yorùbá ni, ní Fásitì Adékúnlé Ajáṣin, Àkùngbá-Àkókó, ní Ìpínlẹ̀ Oǹdó. Bó ṣe ń kọ ewì lédè Gẹ̀ẹ́sì, ló ń kọ lédè Yoòbá
Àwòrán ojú ìwé yìí jẹ́ tí The Guardian Conscience:https://guardian.ng/guardian-woman/help-your-child-form-the-reading-habit/