Lẹ́tà Méjì |Mof’Ólúwawò O MojọláOlúwa

Home Àpilẹ̀kọ, Ewì, Lẹ́tà

atelewo

Àpilẹ̀kọ,Ewì,Lẹ́tà |

March 20, 2019

Lẹ́tà Méjì
***
Mof’Ólúwawò O MojọláOlúwa

MÀÁMI Ọ̀WỌ́N

Màámi ọ̀wọ́n,
 Ìdùnú àti àyọ̀ ni mo fi kọ ìwé yìí.
 Báwo ni ǹkàn? Gbogbo ilé ńkọ́?
 Ṣe ẹ̀ ń tà, ṣ’ájé ń bu igbá jẹ?
 Mo lérò pé ohun gbogbo ń lọ déédéé?

 Mo bímọ ní ìjẹ́ta,
 Ọmọkùnrin làntì lanti
 Ṣe l’ọmọ jọ bàbá ẹ́ bi imú!

 Àngẹ́lì ni Ọlọ́run fi Akin ṣe fún mi -
 Ọkọ nínú àwọn ọkọ.
 Pàápàá ní gbogbo ìgbà tí mo l’óyun, 
 Ṣe ló n kẹ́ mi bíi kílódé,
 Ló n gẹ̀ mí bíi kàsínkan.

 Ẹ̀rù kan tó ń bà mí ni wípé:
 Ṣé báyìí ni yíò maa rí’lọ,
 Àbí ìfẹ fẹrẹnjógi ni
 Bí mo bátún ránti ẹ̀yin àti bàámi,
 Àyà mi a tún já.

 O ti fẹ́rẹ̀ẹ̀ pe ọdún kan ta f’ẹ́ra bàyìí,
 Àfi bi párádísè lojoojúmọ́.
 Ó ń ṣẹ̀tọ́,
 O sì ń ṣe ìtọ́jú mi.
 Ohun gbogbo ló fi yàtọ̀ sí bàámi,
 Bi mo ti wí gẹ́lẹ́ nínu lẹ́tà mi ìjọ́sí.

 Ẹ ti ẹ̀ gbọ́ náà,
 Bóoni bàámi alára gan?
 Ṣé wọ́n ti pa ọwọ́ ọ̀tẹ̀ tì?
 Ṣé ilé ti kúrò ní pápá ìjàkadì?

 Ka má fi ọ̀rọ̀ sílẹ̀ sọ̀rọ̀:
 Kìísu ti yege nínú ìdánwò àwọn oníṣègùn
 Ẹbí wa nàà ti di dọ́kítà.

 Èsì ìdánwò UTME Kìítán nkọ́?
 Akin sọ wípé kó wá ṣe ilé-ìwé gíga fásitì níbí,
 Ṣùgbọ́n ẹ ma tìi sọ fún bàámi o!

 Ǹ ó maa retí lẹ́ta yín,
 Ẹ fi orúkọ ọmọ ránṣẹ.
 Ǹbá ti ni kí ẹ maa bọ̀,
 Ṣúgbọ́n jagunlabí bàámi ò ní gbà.
 Ẹ̀yin méjèèjì kò sì le dìjọ̀ wá,
 Ilé a ti gbóná jù.

 Emi ọmọ yín ni,
 Kìíyẹ̀.

KÌÍYẸ̀ MI Ọ̀WỌ́N

Kìíyẹ̀ mi ọ̀wọ́n,
 Inú mi dùn púpọ̀ láti ka létà rẹ,
 Emi náà ti d’ọlọ́mọọmọ láyé wàyìí,
 Ọpẹ́ ni f’ọ́ba òkè!
 Báwo ni Akin ti ṣe?
 Àna mi àtàtà,
 Okùn ìfẹ́ yín kò ní já
 Ònyà ò ní yà yín láṣẹ Èdùmàrè.

 Ìkókó náà nkọ́?
 Ọmọtuntun àlejò ayé:
 Ọmọbóníkẹ̀ẹ́ Ayọ̀tọ̀míwa Àdìgún.
 Ọlọrun a wòó, a dáa sí fún wa.
 Èdùmàre á bami ṣìkẹ́ ẹ̀.

 Ìdùnú gbàà ni ìròyìn àṣeyege Kìísú jẹ́ fún mi,
 Ìyẹn ni pé, àwa náà ti ní Dọ́kítà ní ẹbi wa nìyẹn o.
 Ọlọ́run kú iṣẹ́ lọ́run.

 Àgbò bàbá yín kò tíì p’àwọ̀ ẹ̀sín dà o.
 Bí o ti ń bínú ló n sọ ìjà sílẹ̀ nígbàgbogbo.
 Ṣe ni ìfúnpa mi ń ga sii.
 Dọ́kità ni kin má fi ṣe ìran wò
 Pásítọ̀ ni ́kín má d’ákẹ́ àdúrà
 Ṣùgbọ́n ohun gbogbo y'Élédùà.

 Maa gbádùn ní tirẹ.
 Jẹ́ kí Akin tọ́jú ẹ bó bá ṣe fẹ́
 Ẹ̀ẹ̀kan làá ṣ’ayé!

 Bá mi tọ́jú ẹ̀jẹ̀ ọrun daadaa -
 Ayọ̀ọ́tọ̀míwá tèminìkan
 Gbogbo yín pátá ni mò ń rántí nínú àdúrà.

 A ṣì ń dúro de èsì ìdánwò Kìítán,
 Bó dára, bi kò dára
 Bàbá rẹ kò ní gbà kó wá s’ọ́ùn-ún.

 Títí di kérésì tí gbogbo ojú á pé.
 Ẹ máa ṣe jẹ́jẹ́ o!
 Kí Ọlọ́run ṣọ wa.


Ní tòótọ́,
 Ìyáà rẹ.

Mof’Ólúwawò O MojọláOlúwajẹ́ amòfin àti ònkọ̀wé. O ti ko ọ̀pọ̀lọpọ̀ ewì àti ìtàn àròsọ ti a ti tẹ̀ jáde lórísirísi ní ilẹ̀ Áfíríkà, ní inú onírúurú ìwé àkójọpọ̀ ewì àti ìtàn pẹlu lori ayélujára. Ó féràn láti máa kọ ìtàn àti ewì, àti láti maa ya àwòrán. Èyí jẹ́ ọ̀kan lára àwọn ewì/ìtàn rẹ̀.

Kílẹ̀ Tó Pòṣìkà |Rasaq Malik Gbọ́láhàn

Àjínkẹ́ẹ̀ mi ọ̀wọ́n |Ọlátúnjí Haleem

Comments

Pingback: My Writing Portfolio – MojolaOluwa's Blog

Leave a Reply Cancel reply