Ḱíkorò Ewúro àti Àwọn Ewì Méjì Míràn |Ìyanuolúwa Adénlé

May 20, 2020

Kíkorò Ewúro

Gbogbo ènìyàn ló mọ̀ pé
 Adùn ló yẹ kí ó gbẹ̀yìn ewúro
 Ṣùgbọ́n kò sẹ́ni tí ó ń
 Bèrè nípa kíkorò tí ewúro ń korò.
 Ilà ń mú ojú gún régé, ṣùgbọ́n                             5
 Kò sẹ́ni tó ń bèrè nípa títa ríro rẹ̀. 
 Elédùmarè ló fi àkókò pín aye é 
 Kò sì sẹ́ni tó mọ̀dí abájọ
 Ohun tí a ṣá à mọ̀ nipé 
 Àsìkò ni gbogbo nǹkan láyé;                            10
 Àsìkò tí ẹ̀dá ń lówó lọ́wọ́ 
 Àsìkò tí ẹ̀dá ń láṣọ lára
 Àsìkò tí ẹ̀dá kò ní ní nǹkankan mọ́.
 Ṣé ọbẹ̀ tí ó bá jiná layé ń jẹ
 Ọwọ́ epo sì ni ayé ń bá ni lá                                15
 Kò yẹ kí ẹ̀dá gbàgbé àná 
 Ipò tí o bá ti bá ara rẹ lónìí
 Múu lò dáadáa
 Ó dáa, kò dáa 
 Ó ń bọ̀ wá dìtàn lọ́la.                                    20

Ìwọ nìkan kọ́ o

Wá ná!
 Ọ̀rẹ́ẹ̀ mi!
 Ṣé o rò pé ìwọ nìkan ni gbogbo nǹkan dálé lórí ni?
 Ṣé o rò pé orí rẹ ni ayé ti bẹ̀rẹ̀ ni? 
 Àbí o rò pé orí rẹ ni ayé pin sí?                            5
 Ta ni ó gan àn?
 Bí wọ́n bá ń sọ̀rọ̀
 Ilé tìrẹ ló dára jù
 Ọ̀nà rẹ ló sunwọ̀n 
 Iṣẹ́ tìrẹ ló gbé pẹ́ẹ́lí                                    10
 Ìwọ nìkan lo ò ní ìṣòro
 Bí ó bá tún wa nínú làásìgbò gan.
 Níṣe ni wà á fẹ̀ ẹ́ lójú
 Igi kan kò lè di igbó
 Ènìyàn kan kì í jẹ́ ọjà                                    15
 Rántí pé ìwọ nìkan kọ́ ni gbogbo nǹkan dálé lórí
 Kò sí olóríire ayérayé
 Olóríire àsìkò ló wà.

***Wọ́n ni àwọn náà fẹ́ kúrò nílẹ̀ yìí***

Lálẹ́ àná ní ìlú yìí

Wọ́n ní ìlú yìí kò dára
 Pé ìlú yìí kò sunwọ̀n
 Orin kan ṣoṣo ni ó wà lẹ́nu wọn
 Àtijẹ-àtimu ti dọ̀ràn
 Àlááfíà ti dohun wọ́n ń bẹ̀bẹ̀ fún                            5
 Wọ́n ni àwọn náà fẹ́ kúrò nílẹ̀ yìí
 Wọ́n fẹ́ lọ bá àwọn òyìnbó gba yìnyín sára
 Wọ́n fẹ́ máa jẹ ohun tó wù wọ́n
 Bẹ́ẹ̀ni, ìlú yìí kò dára
 Bẹ́ẹ̀ni, ìlú yìí kò sunwọ̀n                                10
 Ta ni kò yẹ kí ó máa gbàgbé ọ̀rọ̀ àná
 Pé atẹ́gùn tí ń dààmú ológì
 Ó ti sọ ayéé elélùbọ́ dòfo ò!
 Ìyán mú nílé, ó mú lóko ni
 Ṣèbí ó mọ̀ nípa ará-ilé rẹ                                 15
 tí ó lọ ní ìjọsí
 Tí ẹ ò tí ì gbúròó rẹ̀ dòní
 Nínú ìròyìn ṣèbí à ń rí wọn;
 Àwọn ènìyàn dúdú tí ń tara wọn 
 Féèbó ní Líbíyà,                                            20
 Àwọn tí ń kú sí òkun ńlá 
 Kí wọ́n tó délùú ‘olóyin’
 Àwọn tí wọ́n ti sọnù sí Sàhárà
 Àwọn tí wọn ti tà sí oko aṣẹ́wó
 Ṣé igbó tí ìwọ náà fẹ́ torí bọ̀ nìyí?                            25
 Ẹ̀mí kò láàrọ̀
 Ibo ni kò ti sí ewu?
 Ṣe titi bí wọ́n ṣe ń pa àwọn ènìyàn dúdú 
 Ni kí á kọ́kọ́ rò tàbí
 Iṣẹ́ tí kò sí lọ́hùn-ún ni tàbí                                 30
 pé kò sí ohun tí á jẹ́ tìrẹ ní dúkìà lọ́hùn-ún ni
 Jẹ́jẹ́ layé gbà
 Kò dìgbà tí ó bá kúrò nílùú rẹ
 Kí ó tó rí tì ẹ ṣe o
 Kò dìgbà tí ó bá pàdánù ẹ̀ẹ̀mí rẹ                             35
 kí ó tó là
 Ẹ jẹ́ kí á tọ́jú orílẹ̀-èdè yìí
 Kí ilé ṣe é dúró sí
 Ẹ jẹ́ kí á tú ìlú wa ṣe
 Ohun tí a bá fi sílẹ̀ ni                                    40
 Ẹnu ewúrẹ́ ń to
 Olóṣèlú, ìbàjẹ́ ìlú yìí ti tó
 Aládùúrà, àdúrà nìkan kò le ṣe é
 Ará-ìlú, ọ̀rọ̀ yìí kan yín
 Ẹ tú ìlú yín ṣe                                            45
 Ẹ paná orí òrùlé yín, ọjọ́ ń lọ.

Nípa Akéwì

Ìyanuolúwa Adénlé jẹ́ akéwì àti olùkọ̀tàn tí ó wá láti ìpínlẹ̀ Òsun ní orílẹ̀-èdè Nàìjíríà. Ó jẹ́ akéwì tí ó ti kọ onírúurú ewì ní èdè Gẹ̀ẹ́sì, èyí tí wọ́n sì ti hàn (tàbí tí ó kù díẹ̀ kí wọ́n hàn) ní Kalahari Review, Africanwriter, Empty Mirror, The Hellebore, Onejacar àti bẹ́ẹ̀ bẹ́ẹ̀ lọ. Ó máa ń se àgbéyẹ̀wò àwọn ohun tí ó ń lọ nínú àwùjọ tí ó wà.

Akéwì Àti Ewì Míràn | Ṣégun Ṣóẹ̀tán

À-pè-kánukò àti ewì mìrán | Táófíkì Ayéyẹmí

Ḱíkorò Ewúro àti Àwọn Ewì Méjì Míràn |Ìyanuolúwa Adénlé

atelewo

Kíkorò Ewúro

Ìwọ nìkan kọ́ o

Lálẹ́ àná ní ìlú yìí

Nípa Akéwì

Leave a Reply Cancel reply