Ìtakúrọsọ̀ láàrín Náírà àti Kọ́bọ̀ | Foláşadé ọmọ Oláòníye

September 22, 2018

Ó kúkú ti pẹ́ tí Náírà ti ń gbọ́ nípa Kọ́bọ̀. Kódà ìtàn sọ fun u pé gẹ́lẹ́ tí Náírà gbòde şóun ni Kọ́bọ̀ doun àkàntì, táyé kò ná mọ, léyì tó fi f’igbó şe ilé.
Ó şe ni ọjọ́ kan, Náírà gbéra ó di igbó, ó bẹ̀rẹ̀ sí ní wá Kọ́bọ̀ kiri. Ó dààmú púpọ̀, şùgbọ́n ó pàpà ri i. Ó bá Kọ́bọ̀ níbi tó gbé ń yan òkèté níwájú ilé dídára kan. Náírà nahùn pe Kọ́bọ̀, kọ́bọ̀ dáhùn, Náírà sì tọ̀ ọ́ lọ.

Kọ́bọ̀: Náíra,̀ ìwọ ni, ètí şe, kí lò ń wá nínú igbó?
Náírà: Kọ́bọ̀, ìwọ gan ló gbé mi dé ibí.
Kọ́bọ̀: Èmi ẹ̀wẹ̀! Kò şòro?
Náírà: Kó sì ǹkan àti ǹkan ni wọ́n n ́jọ ń rìn
(Náírà gbọn ara rẹ̀ tó kún fún ìdọ̀tí àti ewé kítikìti ó wo àgbègbè rẹ̀ yíká)
Náírà: Kọ́bọ̀ èéşe tí o fi igbó şe ilé?
Kọ́bọ̀: Şe tí wọ̀n kò bá fẹ́ ní nílu, ènìyàn a ma dárin bi? şebí kólúwarẹ̀ kó ara rẹ lọ ibi tí wọ́n á ti gba tẹni ni.
Náírá: Şé igbó ló wá gba tìrẹ?
Kọ́bọ̀: Ẹni gbogbo ló ni igbó ta wà yí.
Náírà: Şèbí igbó fún ẹranko bíburú ni, àti oríşi-ríşi abàmì ẹ̀dá?
Kọ́bọ̀: Ẹ wo Kọ́bọ̀ yìí (ó yíjú), ènìyàn pàápàá ń gbé ibí yìí. Ǹjẹ́ o mọ̀ pé Tọ́rọ́ àti Sísìn ń bẹ níbí?
Náírà: Tọ́rọ̀ ayé ijọ́un!
Kọ́bọ̀: Ẹhn!
Náírà: Ah!
Kọ́bọ̀: Kódà onírú ẹ̀dá ló wà níbí. Ayé wa dùn nínú igbó yìí. Lótìtọ́ kò şe fi wé tìlú, şùgbọ́n ìlú tárìnrìn àjò ń parí àjò sí lawà yìí.
Kọ́bọ̀: Ilé owó ẹyọ ló wà lọ́kànkán yẹn (Kọ́bọ̀ na ọwọ́ sí ọ̀kánkán sí ilé dídára)
Náírà: Kò mà rí bí mo şe ro. Pẹ̀lú igbó kitikiti yìí, mo rò pé inú ìşẹ́ gidi ni ìwọ àti àwọn àkàntì ìlú wa. Kàkà bẹ́ẹ̀ fàáji gidi lẹ wà.
Kọ́bọ̀: Şé o ri Náírà, oníkálùkù ẹ̀dá ló ní àsìkò tí adẹ́dà fun. Bẹ́ẹ̀ işẹ́ tí adẹ́dà pín lé wa lọ́wọ́ şọ̀tọ̀tọ̀, ó sì fi àkókò le láti şe. Bí eré ìje lórí tí oníkálùkù ní àsìkò láti sátìrẹ̀, asáraparì tirẹ̀, ẹlòmiràn a sì gbà á. Ìgbà èmi Kọ́bọ̀ sá, àkókò tó ìwọ Náírà gbà a. Eré ìje ni ìwọ ń sá lọ́wọ́.
Náírà: Ó yémi báyìí (Ó mi orí). Ó sì wùn mí ki n rí Tọ́rọ́ àti sísì o. Ǹjẹ́ mo lè ma gbé ibí, Igbó yìí wùn mi?
Kọ́bọ̀: Tọ́rọ́ àti Sísì şọdẹ lọ. O kò sì lè gbé ibí, Igbó ìsinmi nìyíì. Ìwọ Náírà kò tí lo ìgbà rẹ tán. Nítorí náà, o kò lè̀ dúró púpọ̀ níbí pàápàá, kí ìpalára má ba wà fún ajé àti ohun pàtàkì ní ìlú. Ipò ńlá ni ìwọ Náírà dì mú láwùjọ. Jẹ́ işẹ́ rẹ tán kí o tó gba ìsinmi. Şe ko wá ma lọ. O kú àbẹ̀wò mi.
Náírà: O şeun Kọ́bọ̀ fún àlàyè rẹ. Bámi kí Tọ́rọ́ àti àwọn tó kùn. Ó dìgbà!
(Náírà jáde lọ kúrò nínú igbó, Kọ́bọ̀ pa lẹ́sẹ̀ da).

Foláşadé ọmọ Oláòníye jẹ́ ọmọ bíbí ìlú Ìdèrè ní Ìbàràpá. Ó parí ní ilé ìwé gíga fáfitì Ọbáfẹ́mi Awólówọ̀ ní ilé-ifẹ̀. O jẹ́ akẹ́kọ̀ gboyè ìmọ̀ òfin. Ó fẹ́ràn láti máa ka ìtàn Yorùba àti láti máa sọ ìtàn lọ́pọ̀lọpọ̀. Ó kúndùn àwọn ìwé àgbà òǹkọ̀wé tó ti sùn ùn nì, D.O Fagunwa, kò le fiwọ́n şeré rárá. Ó fẹ́ràn Yòrùbá lọ́pọ̀lọpọ̀.

Àwòrán: Orí àti Àdìrẹ Oníkòó | Ọláòníye Àllíù Fèyíṣọlá

IKÚ BÙRỌ̀DÁ ÀJÀYÍ L’ÁBẸ́ ÌYÀWO WÒLÍÌ | Kàfí Fáshọlá

Ìtakúrọsọ̀ láàrín Náírà àti Kọ́bọ̀ | Foláşadé ọmọ Oláòníye

atelewo

Leave a Reply Cancel reply