Ewì ní ìrántí Adébáyọ̀ Fálétí, Akínwùmí Ìṣọ̀lá, àti Ọládẹ̀jọ Òkédìjí |Kọ́dáolú Tolúlọpẹ́

Apá Kiní

    Emọ́ kú ojú òpó dí
    Eésùn là, o là dànù
    Ọ̀pálánbá ọtí èèbó fọ́
    Onígbá sọọ́ kò ri sọ
    Ta ń mọ bi ọgbọ́n tún ń gbé?
    Ta ń mọbi òye kù sí?

    Ifálétí ọmọ Àkànbí
    Ikú pa gbe, ó paró
    Ikú pàlùkọ̀, ó posùn
    Ikú pọmọ Fálétí òun Ìṣòlá
    Ó pa gbogbo ọlọ́gbọ́n ayé mọ
    Àràbà baba Lápàdé
    Awo Tàfá,èèyàn Súlè
    Àyímọ́ kìí pọlọ́kọ̀.

    Níjọ́ Adébáyọ̀ kú
    Níjọ́ Fálétí fi wá sílẹ̀
    Tó rọ̀run, igí dá ni
    Odó kò le è ró póró
    Kọ̀ǹkọ̀sọ̀ wọn ò le gbọnra wú
    kẹ́wúkẹ́
    Màjèsín inú ilé kò le è sunkún ọmú         
    Níjọ́ Òkédìjí rọ̀run
    Igbá ilé wọn ò le lura wọn
    Olùkọ́ àwọn àgbà olùkọ́
    Odò ìmò tí gbogbo ọ̀mọ̀wé ń pọn
    Ọmọ ìṣọ̀lá akọ́nimákùsíbìkan.

    Níjọ́ tọ́ ní ọmọ Fálétí kú
    Mo ní irọ́ ni,
    Mo ní ikú kí ní ń pagbe
    tólóko kìí gbọ́ nílé
    Mo ní ikú kí ní ń pàlùkò
    tọ́lọ́sà kìí gbọ́dẹ̀dẹ̀ mọ̀
    Mo ní kú kíní p'ọmọ Àkànbí ẹ wí fúnmi
    Pagidarì igí dá.

Apá Kejì

Ìyá tó báṣọ     
ló bẹ́wù     
ló bí sòkòtò     
Igi àràbà mẹta ló papọ̀dà     
L'éwì, l'éré oníṣe, nítàn àròsọ     
Ọmọ ìyá ni wọ́n     
Ọládẹ̀jọ Ọ̀kédìjì     
Onítàn àròsọ olẹ́tẹlẹ̀múyẹ́     
Awo Lápàdé, èyan Tàfá     
Akínwùnmí Ìṣọ̀lá     
Baba ìyálóde     
Ọkọ Ẹfúnṣetán
Aníwúrà     
Adébáyọ̀ Fálétí     
Awo Adébíḿpé Ọ̀jẹ́dòkun     
Èyàn sáṣore ọ̀rẹ́ àtàtà     
Ìyá tó báṣọ     
ló bẹ́wù     
ló bí sòkòtò     
Ẹ má yà wọ́n     
Ẹ má yà wọ́n

Láti ọwọ́ Omidan Kọ́dáolú Tolúlọpẹ́ (Apálará).Akẹ́kọ̀ọ́ àti Olùkọ́ èdè Yorùbá ni Ifásitì Ìbàdán.